صياعة مع الغفاري وأهل الله في زمن غلط
محمد الحسن سالم حميد

تستغرب يا رسول الله
يا أول وتاني الخلفاء
تستغرب يا أبذر لو جيت
في هذا الزمن الجهجاه
لو فيكم حد يا حنفاء
إتجاسر وقال ما معناه:
(في الدين الطيب لا إكراه)
وبني آدم أدرى بدنياه
أو أن العالم شركاء
في الكلاء ..النار ... وفي الماء
أو حاول ينصح وينطاول
لي حاكم ظالم وقال لا
يا لاقى جهنم مأواه
فتحولو ترابيس شالا
يا راجع نفسه أقلاه
السيف فوق رأسو مخاواة
بالذات الزيك يا أب ذر
بالذات الزيك لو جاء
راكب دغريتو العرجاء
دايماً غلباوي وغالاط
لخباط للعيشة الخمجاء
بالذات الزيك لو جاء
في زمن الزيف المنشر
والتشريعات العوجاء
يا إنباع يا راجي الراجا
يا واقف فوق عمق الدين
يا شايف لي آخر دنياه
يا طيب ... يا إبن الغبراء
الشركة يسارك يا أب ذر
من إسمك واللا من الذر
الكسحت ديكا كريسيدا
داك سيدا أب دقنا شمطاء
وجيب إيدك يلا النيلين
لو درت تشوف العنقاء
يا صاحب النفس الأمارة
بالوعي الديني المحتارة
دا الدين ... المقلعة ده الدين
والمزرعة من فضل الله
سال سيفك داقش شقيش
قدامك عاين كم ديش
الزمن إندقش دقيش
الأمن .. محاكم التفتيش
في كل المدن العربية
حا تلاقي شدرتك مسبية
يا إنتحرت بي بترودين
وعصفورك منزوع الريش
أجلاف كنزوها بلايين
والناس بي الله ويا آمين
بتحلحل دين الكنتين
تنلفت كايس لي مين
الأمن ... محاكم التفتيش
وأصحابك جوة زنازين
وأسيافن صقروا ما فيش
ما إنبعنا وباعتنا قريش
ولأمريكا وبي حبة عيش
والحاكم قبض البقشيش
سال سيفك داقش شقيش
الأمن ... محاكم التفتيش
جنسيتك...بظبورتك...الفيش
في كل المدن العربية
حا تلاقي النفس العربية
في مصحة أمراض عصبية
بين الحجبات والأرتيل
تنململ شاحبة وصفراء
وقافلاها متاريس الديش
والكضبة عمايل الأمراء
سال سيفك داقش شقيش
إتراجع يا أبن الغبراء
يا صاحب النفس الأمارة
بالثورة القادرة الجبارة
إتراجع وأنسى الفقرا
أمثال العسكر غدارة
زراعك تنفد تتنفض
عمالك منك تتجارى
وكل الكادحين الشرفاء
وراح تفضل وحدك في الدارة
راح تفضل وحدك في البر
لا زوجة لا قطة ولا غطاء
لا تكتل نفس يا أب ذر
سيب خونة مكة وتجارا
إتراجع يا إبن الغبراء
في لجة انكسرت بي السارة
زلقتني عجالة الشعراء
فلقتني من الربذة حجارة
سرقتني بدمي الصحراء
أب ذر لا سمعني ولا تبعني
طبطب على همي بيسراه
وكان دمي إنماذج بدماه
بي دم الغبش الشهداء
من اول وتاني الخلفاء
إتجمع في رسول الله
زي نهر بيحفر مجراه
مصلوب فوق عتب الفيحاء
مجلوب في السوق السوداء
وما صرخت بنت أبي بكر
وا إسلاماه ... وا إسلاماه
كانت هي الأخرى وراء القصر
تنململ بين الدهماء
تجار الدين الساقطين
الجنرالات الجبناء
مكتوفة الأرجل والأيدي
مكفوفة الأعين عمياء

عمنا الحاج ود عجبنا
للشاعر محمد الحسن حميد


عمنا الحاج ود عجبنا ديما في اخر صلاته
بسأل المولة السلامة وسترت الحال والكرامة
وعشاء الضيف عنده زي فريضة وفي البيوت ياهو الركيزة
في ليلة من ذات الليالي جاه ضيف في راس حداشر
رحبوبه وفرشله فتشوا العشاء ما لقوهوا
الرقيف ممحوق مقصر والبلد في حال معسر
جاته فكرة امشي الفرم المجاور لرجال العيش يشاور
بس عشاء الضيف يا جماعة ضيفي نازل ليه ساعة
شاكله ودفروه ودوه محكمة الطواري
اهله جنو بي وراهو لي الصباح ما عرفوا حاجة
جاهم الخبر الماكد ود عجبنا بايت في الحراصة
حاكمه الولد المنصب كتفه بالدبور مقصب
ده شنو يا راجل يا مخالف
زول مخرب عقله تالف
انت ما داري بزلت الناس في الطواري
اجلدوه قرموه نفذوا الحكم البهينه
شان يفتح تاني عينه
تسمع السوط في ضهر الحاج ليه خاوية
كل جلدة جبل مزلة في ضمير الحاج الف علة
وفجة رفع راسه شاف بنات ولده وبناته
دمعتن في الخد تسرب وجعتن في الجوف تحرق
نفذوا حكمه راح بيوته
النفس مكسورة وحزينة كيف ملاقات الحليلة
وفي البويتات الوره قادي عمنا الحاج ما عتيادي
وفجة السكيلي ضرب حزاين ود عجبنا ناداه المنادي
وتسمع من يوصي في فراش ود عجبنا
قفلوا الحيشان يا جماعة
اطفوا انوار الرتاين
قفلوا الحيشان يا جماعة
اطفوا انوار الرتاين
داك حرس حصر التجول من بعيد ليكم بعاين
يا زمن حصر التجول
يا زمن حصر التجول
يا زمن حصر التجول


اسأل الله له المغفرة

نادوس

محمد الحسن سالم حميد

الحال وراك كيفن تسر باقيلك انتي بلاك في زين
ما تهشم ابريق الرضا خنست نسيمات السمح
والبسمه زي حبه قمح
لفحا وطفر طيرآ كتر
أورث غصافيري الضنى يبس غناها مع الفجر
هطل على الشجر الهموم وشاشات نهارات العنا
عانيت وراك جنس عنا
بوغ سهادي كرو النجوم
خطو المواويل ارتعش
حرس عصاتي بنات نعش
دومست فوق حجر البتول
هلوست بي صلب المسيح
دروش شردت من الضريح
شويمت بي ظلم الحسين
أومت على كم ميضنه
وما بين عيونك والمغول
ساهد بي قافله الحروف
وايقاع ظنابير الزمن
انصربع ايقاع الفصول
هبطت غمامه ورا الجبل
راحت من الليل الجروف
شهقت شعاب انساني خوف منك عليك على أي زول
وك نياق شوقا الضنا سرح عصا التسيار قبل
درب الحياه المرمول فنا
يا وقعة الواقفين هنال يا وقفه الواقعين هنا
يا آفة الوطن الجريح اشمعنى لا وصلك دنا
لا آفه الزمن المشيح قدرت رويحتي تيقنا
من جيتك المرقت بسيم الدهدهك روحت وين
يا زين مرقت مشيتي وين
غربل عليك ليل المدائن الكان زمانك حالا زين
ناشدتها وفتش نهارات القرى المتكيه فوق شعب الصبر
ساندتها علم بطانا الشيطنه
غنيت معاهم سودانا يا سودانا….
للمتهم والدنيا ليل والقمره بت فاتا القطر
وصف لهم حتة شليل
ردد حروفهم ردتها
وقف سحابي مع الدغش شهدتها
شهدت معايا على العذاب الهد أضلاع الغبش راعفتها
تكلت خدودا على بكاي لا قيت سجون جاهد بها
بي جيهة الجذب القديم دخلت مكندك بالشباب خنت التراب راودتها
فوق ها التراب واعدتها
لا انتي جيتي ولا هي آه روحت وين
يا وين مرقت مشيتي وين
كل البنات جو من المللى
هشت بكت شدت حكت وأزيارنا والمرحات خلي
يا انتي يا مرت العدل ماك في صعيدا تترجي
روحت وين قوليلنا بس من الغلبان تجي

لو فينا أطلعي مننا أو بره أدخلى … أدخلى
غنيتك البارح براي انصلبتو التانيين غناي
والليل بتواتاك شعر دونو انعتاقك أو فناي
هيا يا مغنين الشعر..ضد ها الزمان وطبنجتو
شعر الشعر…شعر أيوه يلا علينا جاي
ونكر المغني كمنجتو
نادوس يا فجر القصائد اندلق
ما حك جلدك مثل ظفرك فأنطلق
انا شرحنا لك صدرك أو شرخنا فأنعتق
يا أنت يا كل الذين لأجل خاطرهم طهوت غداه عقم زهور كلم لتنفتق
غضبآ يؤرق موقديه كورته
رجمآ لكل من تنازل أو تخاذل
أو تشاعر أو تداعر
أو تهاون أو تخاون أو تعاون ضد فتحك أو أتاني ليسترق
تربت يداك…تبت يدا كل الذين تغامزوا
وتهامزو وتلامزو وتقززو وتلذذو
من فيه جرحك يا وطن
نادوس أه … نادوس يا………
أمسينا يا نادوس وأصبحنا بيك يا أم
يا سوسه ضد السوس قلبآ بلاك يضم
ليل الضياع مهووس يحلم هواك يؤم
بعض الحصاد الروس عالم نداهو بعم
ختيت هواك فانوس بقالي شلتو وحم
جيت المدن باخوس لاقيتو جالب السم
راشح هجير البوس وكل الوجود دم دم
كوركت يا نادوس أم الغبش يا أم
يا نخل يا أبنوس يا سامبا يا تم تم
يالبيك غناي محروس دخري الغلابه هلم
دهمني كم مجروس وعكمت تاني وقم
حمرت في السحب المكبرته
يا دخان يا ريحه يا قواده للبحر المخنس والعساكر والملمس..ما تختشى
بيوضه يا ماخده الخريف ما طمبرت عربانا شي
مستني في الزمن النزيف القال بجي وفات بي وشي
رشت النهار بالصبر أبت المغارب تترشي
دقست سواقي المتعبين كايسالا فيها عقاب عشي
بيوضه آه أواه لو الكلمات حصى
قالت لي الله أقرب فرج
أواه لو الكلمات لهب نرجم به وش زمن القسا
قالت في اطن الليل وهج هدام أمان الناس نسي
دنقرت للأرض السربله بالسراب فرغت بي غلبي العوج
فقدت أيادي العصا شديت حزامات الجلد تالا ضرا الواطه
كوركت صد أرجع يا ولد
طوريه أبوك تراها دي عاند كواريك مشيت طوريه أبويا نراها ديك
لفحوها لمن قام يصلي خطاب بكارات الغمام مغرب صباح ليله دخلتو على البلد
حرق عرق الفي الكلام عطشان سقيت عرق الشديره من المطيره الفي كان حس
العساكر لا ورا قالت لي أجر شدره غنايا جريك ضرايا جريك ضرا قبل العساكر ما
تصل قبل الدرادر ما تبين وكانوا العساكر في وشي قت أقول وقع طينه الجداول
ما ها زي طينه جسارتك يا بلد والكل طين
يا نبوت دقه تفوت و لا حلم يموت
النندق نندق نندق ويفضل باقي لهيب الحق
حق الناس ينزل في الحلق
او ينعارض شوكه حوت
يا كهنوت اليجي كابروت
يا جبوت اليجي كابروت
يا كابروت يا كابروت يا كابروت
كابروت عشم وطن الغلابا الحال بلاك تب ما يسر
ما بان صباح أو عسعست قدامنا ليله تزيدنا ضر
أوتارنا يا آخر الغنا حردان عشياتا النغم
فرغت مجالسنا البلاك عنكب على أبوابنا السأم
أنزح كفانا كضب رياح وبكاء رعود وضحك برق
العشب مالي حشا الأراضي جواهو لمن العش حرق
الشعب حي بس كيفت تصد يملابك المليون عرق
كدبنا في الثرى في رجالك ما فينا زولآ ما عرق
ساوين عصا الأشواق مرق
عربان ونوبا نهاتي بيك والزنج تتمناك عتق
ورا يا وجع هيا يا طلق
صد لي ملامحك يا حراز ريح العوارض غربت
فرتق ضفايرك في الرذاذ جية العصافير قربت
لاقيتا في غابه مدينتي وسط شتيلة حبحبت
على عش صغارا الدوب حبت
ما وقف الليل ولا الهجير كم جفت ريقآ وورتبت
لاقت من العنت الكتير ملت الفيافي أحد أحد
فايده جناحى بلا أطير الموت ولا العيشه النكد
با نيل مدد
يا غيث مدد
ندى دمر نادوس ونشوغا
وخلى الناس الصبحت يوم من حيات الخور ملدوغه
خلى الصوت الكبتو الجوع يلقى براحو يضوع ويضوع
الصوت العالي يا صوت الناس التحت الواطى ما مسموع

طواقى الخوف
( محمد طه القدال )

ما خايف المطر
يتحاشي الضهاري الراجية قولة
خيرا
ولا خايف المطر
يمشي علي الصحاري تلموا في
بشكيرا
ولاخايف العشم
يتناسي العشامه ونيما ياكل نيرا
ولا خايف النفس
تتذكر نفسها وتنسي يوم خديرا
شاحدك يا كريم
لايحصل خراب لا أرجي يوم وديرا
وأنا مابجيب سيرة الجنوب
عيال بتسرح للمدارس
والقطور نجمآ بعيد
بنوت بتجري
علي الخطاطيب الخطاطيف
البتجرح
والعريس نجمآ بعيد
الدكاكين التملاء تفضي
السماسره يسمسروا
والبسفوا الطين
يسفو
والبحتوا الراب
يحتو
والبناطلين ليها سستم
والقوانين ليها سستم
البنوك الفيها بستم
من سويسرا ولي ماليزيا
باالسفارات
والعمارات
والخبارات
أنا كنت متغطي
ومندفي
العمة ملوية
والشال علي كتفي
سودان وكان ماكان
سودان علي كيفك
السكة ساعة أيد
والارض مروية
والناس حنان وظراف
والرايح يجيك
للحول
والخدمة مظبوطة
مظبوطة مدنية
والدنيا حرية
الماشي درب الكار يغور
والتاب من التمباك يتوب.....!
أنا مابجيب سيرة الجنوب
الغبوا عرفوهو
والعرفو سووهو
أصبحت زي الزول
قادل بوسط السوق
سروالو ملصوهو
لو العرق مسروق
أوقلبي نشلوهو
طعم الكضب مسلوق
ماسخ تضوقوهو
لو فمي ما مطلوق
أو كمي غسلوهو
ياني البسوي القوق
قولي البتابوهو
ماعندكم دمي
ماعندهم دمي
من دمي لا لا لا
ماقدرو فصلوهو
وانا مابجيب سيرة الجنوب
قول أستقل
انا في صفوف الزوق
واقف مع الواقفين مزنوق بهنيهو
ويهنوهو
أو أستقال
ودا أول الاحزان
أو قالوا باعوهو
ودا ياهو قطيع القلوب
انا مابجيب سيرة الجنوب
فاالسيرة كمين الف عام
لوني المحرق مندكور
وشكلي شكلين
شكل منقة
وشكل تور
دمي المشتت من قبايل نوح وحام
شعري المقرقد زي حصايا
أتشتت فوق الدروب
كتفي المهدل باالعيوب
وأنا ما بجيب سيرة الجنوب
أصل البقت
من ساس وسايس أو يسوس
ياها البقت
خلونا من حرب البسوس
الفاضلة
تكفير الذنوب
الفاضلة لمليم البشاتن
والمعاطن
والحبوب
الباقي
مايخموكا تاني علي
الدفافير والكناتر والحروب
الباقي تعظيم التماسك
في الخطوب
لا نافع الشدة العلوق
ولا نافع المبقوص يحوق
لاينفعك عرق الزنوج
ولا يرفعك لبن العروب
الا الوقوف الفا ضكر
واحد براك
في الشيمة تلفحك الهبوب
الغيمة تديك
للسفاسف
والعواصف
والمطر
برطع مع الافعال
أدخل علي التاريخ
يغلب أجاويدك
من قرقريب عوسك
أخرج من التاريخ
شيخك وعربيدك
ولا نافعك التوبيخ
فامشيه وحيدك
وأمرق علي التاريخ
تلقاه في السهلات
مستني كمسيدك
لابيظلم التاريخ
ولا يرحم التاريخ
إياه عوس إيدك
والارض موقوت القنابل
في الحدود
والارض منهية الثعالب
والطحالب
والجيوش
بااليوناميد
واليوناميس
والفرقة بينات القبايل
والشتايم في المنصات
والشراكة الفي المكايد
والخناجر في الحناجر
والمنابر
أه من تلك المنابر
أنداية كرتلة وبنابر
والجرايد
داقة طارات المدايد
الصدق في الناس كذوب
الساسة نيام العسل
بين أنتباهة
وغفلتين
بين السلاطين والجيوش
والشلاتين
والقرايب
فين حلايب?
واللي بني الارض كان في الفرض
سوداني
عيني عليها
أتمزعت
حتة في قلبي وحتة في قصتي
تاني
أدي أسرائيل في النيل
بكيني ولعبطني
والنيل أدنداني
أحنا حبايب في الطيبة والاه?
غنيلي ورقصني
طيب
بس سمعني أه الاه وداني...
أنقد السقا ومابنصلح وكايو
وأنكشح اللبن مابنفعن بكايو
بعدن في الدروب مابقصرن تكايو
والشاكي النقاص ناقص قمح
شكايو
وأنالابجيب سيرة الجنوب
ولا أكلوني
أذا ما أكلو التور الابيض
(الارض في الجزيرة)
وبدر الله فوق سماهو
ياساسا ياباسا حوتة
مكوار حبس مياهو
عطشت قبايل أبقوتة?
البودة في خلاهو
والارضة في بيوتا?
الزول ربت كلاهو
سمينة بي مقوتة
ياتمت المعاهو
أو خلصت الحدوتة
وانا لابجيب سيرة الجنوب
ولا أكلوني
أذا ما أكلو التور الابيض
بدر الله يا بسلوكة
سلوكة الجزيرة
كل يوم فينا بتنتش
سكك الحديد بي كم?
بي كم بيت المفتش?
والبيع بيعة عدوكا
بعت الارض باترابا??
باكر تبيع أبوكا
وان مت من تخمة باكر
ناس الشرق يبكوكا
وناس الغرب يبكوكا
وناس الشمال يبكوكا
وناس الجنوب يبكوكا
وانا لابجيب سيرة الجنوب
ولاأكلوني
أذا ما أكلو التور الابيض
حمدتكم باالجاية
والجاية فوق الجاية
وعسكري الجباية
قلبو الحجرللداية
بشرتكم باالسادة
والسادة بعد السادة
وجرادة فوق جرادة
من دوكة لام كدلادة
حمدتكم باالواقعة
والصاقعة جنب الصاقعة
مقدودة ما لها راقعة
والدمعة صابة وناقعة
بشرتكم باالتوبة
والصبنة لي الدامبوية
في الحلة دي أم كدوية
ماتقعدوا شدرة موية
والارض لا حليوة
ولاها دي الجزيرة
الارض أمات الحنين
لو نقط الضحاوي البريق
في الحين تبتق شهوتن
تحبل
كما الامات
وتشرق باالوحم
لو تسعة الميلاد بتفرق في السنين
أو دي الشوارع باالبنات متحينة
ترسل تراتيل الخروج في يوم
وتقطع سيرتن
الارض تعريف الهديل
هدل الحمام بشري
وشوق السلام أنسان
باالحيل بيعرف أنتن
والارض شافت
إلا خافت
من عيون الليل
تناجي حبيب
غريب في الليل
وتفرز غنوتن
زي بذرة في جوف الارض
أو ضحكة عند طرف القلب
بتغني لو جات في العيون
والضحكة لاقت مرقتن
الارض منصوص الضمان
حضن أمك الدافي وأمين
ريحة حبيب
جاني من شمت حبيبتي وكرفتن
لو جاتا في يوم الهموم
في الحين تزغرد فرحتين
أو حرقصت فوقها السموم
باكر تهبهب نسمتن
والارض مابتعرف تنوم
ترتاح
وغابت جمتن
بس تدي مدين للعديم
باالمدة تحفظ ذمتن
هن مارقات خلاهن
ما مارقات براهن
لي بصاص حداهن
أو قصاص براهن
هن مارقات تراهن
تريانات تراهن
الخوف ماحماهن
من شوفة حماهن
طمانات جناهن
بي لبنا معاهن
يوم الشينة جاهن
باالعز المبطر
والزوق الشفاهن
لا حايدات مداهن
لاقايدات عماهن
وما كشحن بلاهن
فوق زولأ أباهن
لو الضيم ماهن
هن ياهن
وماهن
وانا مابجيب سيرة الجنوب
لاني زول باالمرة خايف
الاشايف
الاشايف
الاشايف
الاشايف
أناشايف المطر
يتجاشي الضهاري الراجية قولة
خيرا
واناشايف المطر
يمشي علي الصحاري تلمو في
بشكيرا
وانا شايف العشم
يتناسي العشامي ونيما ياكل نيرا
واناشايف النفس
تتذكر نفسها وتنسي يوم حديرا
واناشايف البلد
الطيب جناها وقمنا في شديرا
شاحدك ياكريم
لاتحصل خراب لا أرجي يوم وديرا

مســـدار ابــو الســــــره

(القدال)

اماتي القبيل بي حنهن لقني
كرفة وقلدة كيف شوف اللبن
رجنّي حزنا جاني في
ميع الصبا يلجني اطلع
مني يا جلدي المنمل جني
واطلع مني يا حزنًا بقى مكجني

خلني ابدا مسداري
واودي قفايا لي دارا بقت مي داري
جيت الجلدي بيني وبين عضايا الشحمة الا النار بقت قدامي
جلدي الليلة بيني وبين عضايا المافي
الا تراني شوال الكبس نفيخ جلاليب الورم هدانّي
في جلدي الورم قولنلي ولا صحي الورم عضاني
سفريتك مي في النية
ماها الكانت محرية
خابراك عريف زم العربان ولّا قيام الوردية
مالك تريان ومندي كاسي الكتان والهندي
قولك ككيف ترجى البيشان ولا الغربة البي زندي
برق العبدلي الوزني ما طاش يا جاب المزن
فرق ياالضيف فعل الغضبان انفر ثيران الحزن

شن القعدة يا ابو السرة شن القعدة
في ضل العمارات ام كمرتًا بره .. ضقنا الحنضل اليانكي
وبلعنا المرة كملت كوتة التمباك صقعنا الجرة
وكت اتقفلت شقيش قبل بالمرة لن
يأمرنا في بلد المعاني الحرة
الشم خوخّت بردن ليالي الحرة
والبراق برق شوف عيني الصقير بي جناحو كفت الفرة
تلقاها ام خدود الليلة مرقت برة
مرقت برة تغلي مديدة الحلبة التسمن ردفها
السمن المبستر يانكي
والويقود قعيرات الدخان في العين وفي الفشفاش بسوي عمايلو
شن فايدة مديدة الحلبة يا ابو السرة شن فايدة مديدة الحلبة
الويقود يشيلو اليانكي
قامت من دخاخين العمى تلمع وشيها اليانكي مستنيها
كان اليانكي مستنيها في مراية السجم
في الليل لقيتها متل فرايخ الطير مرق ود عينها من ود عينها
رجافة المزمة الحمى جفلت منو وقعت عندي صدرها بغلي
يا ابو السرة شفت اليانكي في ود عينها
حسها للبحر
يمكن يغسل عينها من اليانكي
فتنا الحجرة بالكتة وغتسنا مسافة
تبقى قدر مسالك الريده ما لاقانا من يغبانا في
البحر الفضا التحتاني
ناس عارفاها ناس عارفاك ناس عارفاني
نادينا القعونج والبلطي قرقور السمك ودانا لي دابي الخشش
نادينا عمال الطمي الصارقيلا والقرموط وود الموية وقتنا عليها
كانت نايمة عجال البحر حارساها
كا نت نايمة بين حجرين
وضل ساسوية وعمال الطمي
الصحونا خابرين الدروب لمّو حصى البحر قسموهو
يات من كان سبع جمرات دابي الخشش قال ادوها
في الجمرات تلات سبعات
قلنا ادوها في في الجمرات تلات سبعات
مسكنا دربنا وعمال الطمي مرقوبنا في مشرع مسارب الضي
لقينا الدنيا تترجانا قوقى القمري خوّى صغيرو وعوّى حدي
وعمال الطمي الصحونا لمّو على البعرفو الصي
حصى القيزان دوابي الدارقة والسحلية والناس التحت
خابرين عمايلاليانكي
قولن للاخلا ديارو
دمك فرهد في نارو
غورّ في الارض طارو صقرين
اولاد الارض ما طاروا
لحمي غطى بن عمي شو صار حالو يا امي
منديل العرض في بيت الدين دمي ما يخلي دمي
انا من دير يسن صرنا في جزر التين
عم نسقي بعض حب الزيتون
بدو يرجع للطين صابرا تحت الدورية
صابرة تحت الدورية .. صابرة فوق الدورية
يا حالة ضد لحم الطفلين نابت غصن الحرية جزري مو في شاتيلا
ما قال حالي يا ويلا احنا في الارض
ارض فلسطين يا امي
هيلا هيلا
قوقي القمري خوّا القي وعوّا حدي
وكنا جماعة دابات الارض والسايمة وعوامة البحر والطير
وحتى الغيمة دفاقة المطر فوق راسنا شايفة الدرب
دريب اليانكي لا يودرنا قال الدابي للضليلة خليك صاحية
زوغ اليانكي لايودرنا
قال الدابي ان يغباها ما بيغباني
ولما الشم مودع غاربة وصّت جملة الصقار عيونن كاربة
ابقو الف بفوت للمتلكم ناهدين
وفوق دينن عريبا غادي
قال السحلي لا تغشوهو دول عربان توابع اليانكي
قال الجمعي لا نغشاهو دول عربان توابع اليانكي
وخلوها العريب الغايبة السراق طليقو معاهو
تيجانا عروشها الخروع الهش العويش النار تعلق فوق عقال العرش
ولا خسانا بي هادي العروش الغربة
يا ابو السرة لا عقام مسكنا دربنا وعمال الطمي الصحوها
خابرين الدروب
مرقوببنا من وادي الضلمة الكان عقب لمينا في باقي الجمع قاصين دريب اليانكي
شمور الضيب في الكنغو وخبرا من جنوب امريكا ومن كلهاري ديبا ضاري
والتمساح وليد امزون ونمرا في النمور كمبودي ونمرة خلا الله مكسيكية
ولما لميمنا والشمس البتوقد فوقنا شد شديدنا التمثال مشيل روقنا وعالم
يدوعل فوقنا لي يوم فوقنا نبزغ فيهو في عينيهو جر واسوقنا

يا شمس طلي طلي
شاوري على بيتي دلي
كيال الكيل ختياري مات ظلي عم يحرس ظلي
عادل على خيي ميلي خيي لا يحمل شملي
ما خف الشمل تاني المرات ما كل الرصاص شيلي
عيني في الفيل ما ظله
كلنا ندريه ما نضله
يا ويل الويل نرمي الجمرات
عدّي المستشهد كله
عدي المستشهد كله

أيّ مساءٌ هذا ؟
صوت الحَنين فيه يعْـبر كل شيء .

اللهم أنت أعلم بحال قلوبنا منّا فاغدق عليها رحمتك ولطفك الذي تحتاج